Oluvannyuma lw’okuva mu bulamu bw’ensi eno, enteekateeka z’okuziika munnamawulire Geoffrey Kaweesa zifulumye.
Kaweesa nga yafiiridde mu ddwaliro e Kiruddu gy’amaze ebbanga ng’ekirwadde kya kkansa kimugoya agenda kuziikibwa ku kyalo Namawojjolo-Buligobe ekisangibwa mu ggombolola y’e Nama mu disitulikiti y’e Mukono olwaleero ku Lwokusatu nga May 22, 2024 ku ssaawa kkumi ez’olw’eggulo.
Kaweesa nga yazaalibwa nga June 18, 1985, yafudde ku Lwokubiri nga May 21, 2024. Ono yakolerako mu lupapula lwa Red Pepper, ku TV ya WBS, Delta TV ne Top TV kwe yasemba okukolera ng’asoma mawulire.
Kaweesa mutuuze w’e Mukono yeesimbawo kko mu by’obufuzi nga wa DP, era yavuganyaako ku kifo kya mmemba wa palamenti owa Mukono North wadde nga teyayitamu. Kyaggwe TV yategeddeko nti Kaweesa y’abadde omwogezi wa DP mu munisipaali y’e Mukono.
Omwoyo gw’omugenzi Omukama Katonda aguwe ekiwummulo eky’emirembe.
The post Enteekateeka Z’okuziika Munnamawulire Kaweesa Ziizino appeared first on Kyaggwe TV.