Ekkanisa ya Uganda eguddemu leenya ssitaani bw’akemye musajja wa Katonda ali ku ddaala ly’omubuulizi okukkakkana ng’asenzesenze omuyizi w’essomero n’amutwala mu loogi n’amutunuza mu mbuga za sitaani.
Omubuulizi mu kadde kano eyeevuma ssitaani ye Nicholas Muhumuza ow’ekkanisa ya Uganda ey’e Katojo mu Busaabadinkoni bw’e Bikungu mu bulabirizi bwa West Ankole.
Muhumuza yakwatiddwa ku Lwokusatu n’omuyizi w’essomero gwe yalonze ekkubo ng’ali na mu yunifoomu n’amutwala mu loogi ya Homeland Bar and Lodges e Kasaana ng’aba poliisi baagenze okubatemyako bagende bamugguzeewo akasenge, nga yamaze dda okweggwera ebyassava by’omuyizi ng’ali mu kussa bikkoowe.
Kigambibwa nti Muhumuza okukwatibwa waliwo omutuuze eyamulinnye akagere n’amulaba ng’awalabanya omuyizi w’essomero eyabadde ayambadde ne yunifoomu n’amuyingiza loogi ng’ono ebbanga lye yamaze ng’ate agenda ku poliisi okufuna abasirikale, we baatuukidde mu loogi nga Musajja wa Katonda yamaze dda eccupa okugiggyako obucu era abeerabiddeko n’agaabwe baategeezezza nti waabaddewo n’obupiira obumaze okukozesebwa.
Olw’okuba ono baamukwatidde mu kituli nga talinaawo wadde omukisa ogwegaana, poliisi yamuwazeewaze n’emitwala n’emuggalira ku poliisi e Kasaana n’aggulwako omusango gw’okujjula ebitannajja.
Omwana yategeezezza poliisi nti Muhumuza yamusanze mu kkubo ng’agenda ku ssomero n’amusaba bagende mu kirabo amugulire ku mmere wabula ng’ate yagenze okulaba nga boolekedde loogi n’ebyaddiridde bakira abyogera ananaagira…
ABATUUZE BATABUKIDDE POLIISI OLW’OKUYIMBULA OMUBUULIZI
Wabula ate abatuuze kyabaweddeko bwe baabadde bakyali awo ne balaba ng’omubuulizi gwe baabadde basuubira okutwalibwa mu kkooti ng’abayitako adda waka wadde ng’omusango ono yabadde azzizza gwa naggomola ogw’okusobya ku mwana atannetuuka!
Bano ensonga baazikutte bukolokolo ne bazitwala mu woofiisi ya RDC Purekeria Muhindo ng’ono yategeezezza nti agenda kuzilondoola nga ssinga anaakizuula nga waliwo okwekobaana okutta omusango, abeenyigidde mu kikolwa kino ka babe ba poliisi oba abazadde b’omuwala baakukangavvulwa.
Omukubiriza w’Abakulisitaayo mu kkanisa ya Mubuulizi Muhumuza nga ye Godwin Twikirize yalaze okunyolwa kwa maanyi olw’omuntu gwe babadde balabiramu ekifaananyi kya Katonda okukkakkana n’atuuka ku ddaala lino.
Twikirize yagambye nti nabo ng’ekkanisa tebakyayinza kukkiriza muntu yeetyobodde kutuuka ku kino kubakulembera mu kkanisa ng’ensonga bagenda kuziyisa mu makubo amatuufu mu kkanisa balabe nga babawa Omubuulizi omulala.
*Source – Lupapula lwa Bukedde*
The post Akasattiro mu Kkanisa! Omubuulizi Bamukwatidde mu Loogi Ng’akabassanya Omuyizi W’essomero!!! appeared first on Kyaggwe TV.