Munnakyaddondwa yanywedde akendo mu Bannalulungi okuva mu masaza ag’enjawulo mu mpaka ez’akamalirizo ezaabadde ku Hotel Africana ku Lwokutaano.
Namale Kisha Ruth okuva mu ssaza lya Kabaka ery’e Kyaddondo ye yasitukidde mu kapyata w’emmotoka oluvannyuma lw’okuwangula empaka za Nnalulungi w’Ebyobulambuzi mu Buganda 2024.
Namale eyeddira ekkobe yaddiriddwa Zalwango Miriam okuva mu ssaza ly’e Buddu ate Bisoboka Ruth Mitchell okuva e Bugerere n’akwata ekifo eky’okusatu.
Omuwanguzi Namale yakwasiddwa emmotoka gye yawangudde n’ava ku Africana ng’avulumula olwo banne bwe baabadde bavuganya bbo ne bakoma ku kwegomba nga balaba ye munnaabwe yejjawo.
Ye nnalulungi w’essaza Kyaggwe Nuliat Nakangu Kyazze yawangudde eky’okubeera omuyiiya ow’omwaka guno, Miss Innovative.
Mu mpaka zino, abawala abato bafuna embavu z’okwekkiririzaamu, okumanya eby’obuwangwa bwabwe, okufuna obuvumu okwanganga ebizibu, okubeera abayiiya n’ebirala bingi.
The post Ow’e Kyaddondo Asitukidde mu Mpaka Za Nnalulungi wa Buganda Ow’eby’obulambuzi appeared first on Kyaggwe TV.