BYA TONNY EVANS NGABO
Omuwendo gw’abalamazi abakyakonkomalidde ku kiggwa ky’abajulizi e Namugongo gugkyali munene wadde ng’emikolo egy’okulamaga gyakomekkerezeddwa olunaku lw’eggulo ku Mmande nga June 3, 2024.
We bwakeredde ku Lwokubiri ku makya, ng’abakulira ekifo kino bakola butaweera okulaba nga abantu bano baddayo mu byalo byabwe gye byavudde. Kyaggwe TV yakitegeddeko nti abamu ku balamazi bano baatambuzza bigere okutuuka e Namugongo nga baavudde mu disitulikiti ez’ewala ddala mu kiseera kino gye bagamba nti tebayinza kutambuza bigere okuddayo.
Abamu ku bano bagamba nti baabadde ne ssente ne zibabbibwako ate abalala nti zaagudde nga n’olw’ekyo eky’okukola tebakirina.
Bwanamukulu w’ekigo ky’e Namugongo Fr. Vincent Lubega agamba nti bagenda kukwatirawamu n’olukiiko oluteesiteesi okulaba nga abantu bano baddayo gye baavudde mu kitiibwa.
Fr. Lubega mu ngeri y’emu ategeezezza nga kati bwe babakanye n’eddimu ery’okulongoosa ekiggwa kino ekyalekeddwa mu mbeera etali nnungi olwa nnamungi w’abantu eyabadde mu kifo kino olunaku lw’eggulo.
Wabula abamu ku bakristu abakyasobeddwa boogeddeko ne banammawulire ku ngeri bannaabwe gye bababuzeeko e Namugongo ne babaleka nga tebalina yadde ekikumi ekiyinza okubazzaayo ewaabwe.
The post Abalamazi Bakyakonkomalidde e Namugongo Lwa Kubulwa Ntambula appeared first on Kyaggwe TV.