Omulabirizi w’obulabirizi bw’e Mukono, Enos Kitto Kagodo atongozza bboodi empya eya bbanka y’obulabirizi bw’e Mukono eya Mukono Diocese SACCO (MUDISACCO).
Bp. Kagodo abakulembeze abaggya abalondeddwa abakunze okubeera abeerufu, abaayiiya era abeetefu okugatta omutindo ku bbanka eno okuyita mu kuteekawo engeri ez’enjawulo ezinaasikiriza Abkulisitaayo mu bulabirizi okugyegattako batandike okutereka n’okwewola ensimbi, bakole basobole okukulaakulana.
Omukolo gw’okwaniriza abaweereza ba MUDISACCO abaggya gubadde ku Warnda Food Garage esangibwa ku Mukono Pension House Building ekirinanye ekitebe ekikulu eky’obulabirizi bw’e Mukono.
Bboodi empya ekulemberwa Rev. John Joseph Bumanye ng’ono amyukibwa Susan Wamala Sserunkuuma nga ye mukulu w’essomero lya Mukono Boarding Primary School era akulira abakulu b’amasomero g’ekkanisa aga pulayimale mu bulabirizi bw’e Mukono.
Bp. Kagodo asiimye abaweerezza ku bboodi enkadde olw’eobuweereza obw’emyaka etaano bwe bakoze. Bbo abali ku bboodi empya baakuweereza mu kisanja kya myaka ena.
Omulabirizi akunze amasomero n’amatendekero agali mu bulabirizi bw’e Mukono okuggulawo akawunti mu bbanka eno baterekeyo ensimbi zaabwe ate beewole basobole okubeerako polojekiti ze batandikawo okugaziya ku by’enfuna by’amasomero gaabwe.
Ye Rev. Bumanye oluvannyuma lw’okukwasibwa woofiisi aweze okukola kyonna ekisoboka okulaba ng’abbulula ekittavvu ky’obulabirizi kino, Abakulisitaayo basobole okwongera okukiteekamu obwesige.
The post Bp. Kagodo Atongozza Bboodi Empya Eya Bbanka Y’obulabirizi bw’e Mukono appeared first on Kyaggwe TV.