Bya Tonny Evans Ngabo
Omubaka wa palamenti omukyala owa disitulikiti y’e Wakiso, Betty Ethel Naluyima baamuggye ku mudaala gw’abanoonya. Ono bba Ying. Tadeo Lugoloobi amukubye empeta wakati mu Lutikko e Lubaga mu kibuga kya Ssaabasajja Kabaka eky’e Kampala.
Omubaka Naluyima ne bba Lugoloobi bakubye ebirayiro by’okwagalana okutuusa okufa lwe kulibaawukanya, okwagalana mu bwavu n’obugagga, mu bulwadde ne mu bulamu nga Ssaabasumba w’essaza lya Klezia ekkulu, Paul Ssemogerere y’akulembeddemu akanyomero kano.
Balugoloobi basembezza abagenyi baabwe ku Forest Park e Buloba mu Busiro ng’eno Omulangira David Kintu Wasajja gy’asinzidde n’asaba Banayuganda obutasaagira mu nsonga ya maka n’obufumbo kubanga mwe muyimiridde eggwanga erye ssanyu oba ery’ennaku kubanga byonna mwe bitandikira.
Omulangira era asabye abantu okufaayo ennyo ku bigenda mu maaso kibayambe obutabongoota wakati mu kusomoozebwa okwa buli ngeri ate basomese abaana ku mbeera y’ensi nga bw’eri .
Minister wa Ssaabasajja ow’obuwangwa, ennono n’embiri, Owek: Anthony Wamala, asabya abafumbo okutunuulira eky’okwagalana era bakitwale nga kikulu nnyo mu kuwangaaza amaka.
Pulezidenti wa NUP, Robert Kyagulanyi Ssentamu aweeredde Omubaka Naluyima obujulizi n’agamba nti ono mukyala muvumu, omukulembeze ateerya ntama ate atakyukakyuka ng’abalala abakirako kitengejja ku mazzi.
“Omubaka Naluyima munnankyukakyuka atatangatanga ate omuwagizi w’Obwaakabaka bwa Buganda atabongoota. Nsaba Ying. Lugoloobi omubaka omukwate ng’ekyatika,” Kyagulanyi bwe yategeezezza.
Omubaka Mathias Mpuuga Nsamba awamu ne Medard Lubega Sseggona Akalyamaggwa baasinzidde wano ne bategeeza nga bwe beetaaga abantu nga Naluyima abatalya mu lulime ne mu luzise ng’ate baagala eggwanga lyabwe Buganda ne Uganda okutwaliza awamu.
